الحب الحقيقي True-love

8:30 م
الحب الحقيقي True-love

الحب الحقيقي


- فـ مسلسل ضمير أبلة حكمت كانت العلاقة بين ( حكمت هاشم ) مديرة المدرسة وجارها القبطان السابق ( وجيه ) من أنضف العلاقات اللى اتجسدت فـ عمل درامى مصرى .. الأتنين جيران العواجيز اللى باب شقة ده فـ وش باب شقة دى واللى قربوا من نهاية العمر وكل واحد منهم له دنيته المختلفة عن التانى بس بينهم أرضية مشتركة أنهم اتعودوا يتقابلوا كل يوم الساعه 6 الصبح ع الكورنيش فـ إسكندرية عشان يتمشوا ع البحر .. يحكوا لـ بعض ع مشاكلهم .. يأخدوا رأى بعض فـ أمور مهمة .. علاقة شيك بين اتنين ناضجين بالقدر الكافى .. أغلب مشاهد المسلسل كانت داخلى فبالتالى اللى بيتفرج ع المسلسل بقت بالنسبة له المشاهد بتاعتهم ع البحر كأنها فسحة له هو كمان

- وأنت بتتفرج كنت بتحس إن ( وجيه ) بيحب ( حكمت ) و إنه مكتفى بمساحة وجوده جنبها ومش راضى يعترف لها بحبه عشان مايخسرهاش حتى ولو كـ صديق .. علاقة طاهرة ونضيفة ملهاش أى غرض غير بس القُرب .. حتى لما ( حكمت ) جالها ثروة من السما وكل اللى حواليها طمعوا فيها كان ( وجيه ) الوحيد اللى انسحب بهدوء من المشهد وتعمد أنه مايظهرش فـ الصورة نهائى عشان مايتفهمش غلط .. لكنها لما أحتاجته لقيته قدامها بدون ما تطلب .. عارف فكرة أنك تحب حد فـ صمت ومن بعيد لـ بعيد وتكون فـ نفس الوقت قريب أهو هو ده

- لو فكرت وبصيت حواليك هتلاقى عندك شخصية بتحبك ومش عايزة منك حاجة غير إنها تلاقيك مبسوط .. ممكن تكون عارفها هى مين بس بتستعبط .. وممكن من كتر ما هى بتقدم وضامن إنها موجودة تكون عينك اتعاملت معاها بـ حياد فـ مبقتش تشوفها كويس .. ( وجيه ) مش شرط يبقى حبيب ممكن جداً يكون صديق أو قريب .. عموماً كل واحد فينا ( سواء راجل ولا ست ) فـ حياته نموذج شبه ( وجيه ) بكل نقاؤه وزُهده وتردده إنه يتجاوز حدود هو حاططها معاك عشان مايخسركش من كتر ما بيحبك .. عمره ما بيزعل منك .. أكتر واحد بيبعد لما يحس وجوده هيضايقك .. أكتر واحد بترتاح لما تفضفض معاه .. وأول واحد وقت ما تعوزه بتلاقيه .. دوّر ع ( وجيهك )

شارك الموضوع

مواضيع ذات صلة